နိုင်ငံတကာလွတ်ငြိမ်းချမ်းသာခွင့်အဖွဲ့၏ နှစ် ၅ဝ ပြည့်အထိမ်းအမှတ်

နိုင်ငံတကာလွတ်ငြိမ်းချမ်းသာခွင့်အဖွဲ့၏ နှစ် ၅ဝ ပြည့်အထိမ်းအမှတ်အဖြစ် အလွမ်းများနှင့်ဧရာဝတီဇာတ်ကား မိတိုးမြို့တွင်ပြသ၊ ဇာဂနာအကြောင်းပါသည့် မှတ်တမ်းရုပ်ရှင်ကိုလည်း နိုဝင်ဘာ ၆ ရက်နေတွင်ပြသဖို့စီစဉ်နေ

ကမ္ဘာတစ်ဝှမ်းရှိလူပုဂ္ဂိုလ်အားလုံး မွေးရာပါကိုယ်ပိုင်လွတ်လပ်ခွင့်ရရှိဖို့နှင့် မတရားသဖြစ် ဖမ်း ဆီးနှက်စက်မှုများကင်းစင်ပပျောက်ဖို့ လုပ်ဆောင်နေသည့် နိုင်ငံတကာလွတ်ငြိမ်းချမ်းသာခွင့်အဖွဲ့(Amnesty International- A.I)၏ နှစ် ၅ဝ ပြည့်အထိမ်းအမှတ်အဖြစ် ဂျပန်နိုင်ငံအခြေစိုက် A.Iဌာနခွဲမှ 'အလွမ်းများ နှင့်ဧရာဝတီ'ဇာတ်ကားကို အီဘာရာကီခရိုင်၊ မိတိုးမြို့တွင် အောက်တို ဘာလ ၁၆ ရက်(တနင်္ဂနွေနေ့)မှစ၍ ပြသခဲ့ကြောင်း သိရှိရသည်။

အဆိုပါဇာတ်ကားသည် ၂ဝဝ၈ မေလဆန်း(၂ ရက်နှင့် ၃ ရက်နေ့)က မြစ်ဝကျွန်းပေါ်ဒေသ၊ ဧရာဝတီတိုင်းတွင် နာဂစ်ဆိုင်ကလုန်းမုန်တိုင်းတိုက်ခိုက်ပြီးနောက် အုပ်ချုပ်သူအာဏာရှင်များ၏ လူသားမဆန်စွာ ဥပက္ခာပြုလျစ်လျူရှုခဲ့မှုကြောင့် ဒေသခံပြည်သူများ အတိဒုက္ခရောက်ခဲ့ရပုံ၊ ကူညီပေးခဲ့သူများကို ဖမ်းဆီးထောင်ချခဲ့ခြင်းများနှင့် ကယ်ဆယ်မှုနှေးကွေးခြင်းကြောင့် မသေသင့်ပဲသေဆုံးခဲ့ကြသည့် မုန်တိုင်းဒဏ်သင့်ပြည်သူများ၏ ဘဝအခြေအနေဖြစ်ရပ်မှန်ကို ဂျပန်ပြည်သူများနှင့်တကွ နိုင်ငံတကာကပါ သိရှိအောင် နိုင်ငံကျော်ပန်းချီဆရာကြီးဦးဘသစ်၏သား ဒါရိုက်တာသစ်သား(ခေါ်)ကိုဌေးသစ်က မှတ်တမ်းရုပ်ရှင်ဇာတ်ကားမျိုး ကြိုးစားရိုက်ကူး ခဲ့ခြင်းဖြစ်ပြီး ဂျပန်နိုင်ငံရှိအနုပညာဝါသနာပါသူများနှင့် ဝိုင်းဝန်းကူညီခဲ့ကြသူ လူ(၇ဝ)ကျော် ပါဝင်သရုပ်ဆောင်ပေးခဲ့ကြသည်။

၎င်းဇာတ်ကားကို ၂ဝ၁ဝ သြဂုတ်လ ၂၉ ရက်နေ့မှစတင်၍ တိုကျိုမြို့ တွင် စတင်ပြသခဲ့ပြီးဖြစ်သော်လည်း ဂျပန်ပြည်သူများနှင့်တကွ ဂျပန် သတင်းမီဒီယာသမားများ၊ ရုပ်ရှင်ဒါရိုက်တာများ၏ ချီးကျူးဂုဏ်ပြုခြင်း များကို ယခုအချိန်အထိအစဉ်တစ်စိုက်ဖော်ပြခံခဲ့ရသည်။

''ကျနော်တို့ ဒီလောက်အထိ ဖြစ်လာမယ်လို့ တစ်ကယ်ကိုမမျှော်လင့်ခဲ့ ပါဘူး။ ကိုယ့်နိုင်ငံမှာတစ်ကယ်ဖြစ်ပျက်သွားခဲ့တဲ့ အကြောင်းအရာတွေကို အားလုံးသိရှိအောင် မှတ်တမ်းသဘောမျိုးတင်ဆက်ခဲ့ကြတာပါ။ အားနည်းချက်တွေလည်း အများကြီးရှိပါတယ်။ စက်ပိုင်းဆိုင်ရာအားနည်းမှု၊ ရိုက်ကွင်းရိုက်ကူးရေးပိုင်းမှာအားနည်းမှု၊ ငွေကြေးပိုင်းဆိုင်ရာ အားနည်းမှု၊ အချိန်အခက်အခဲ၊ နောက်ပြီး ကျနော်တို့ရဲ့ ရပ်တည်ရေးကိစ္စနဲ့ စားဝတ်နေရေးကိစ္စ အစရှိသည်ပေါ့ဗျာ။ သို့ပေမယ့်ကျနော်တို့ အစွမ်းကုန်ကြိုးစားခဲ့ကြတယ်။ ဒါကို ဂျပန်သတင်းမီဒီယာတွေက သိရှိသွားပြီး သတင်းစာတွေ၊ တီဗွီသတင်းတွေမှာဖော်ပြကြတယ်။ သူတို့က ဂျပန်မှာ ရှိတဲ့ ကျနော်တို့မြန်မာတွေရဲ့ကြိုးစားမှုကို ချီးကျူးဂုဏ်ပြုတဲ့သဘောနဲ့ ဖော်ပြကြတာပါ။ ဂျပန်ဒါရိုက်တာတွေဆိုရင် မော်ဒယ်အောက်နေတဲ့ ကင်မရာတစ်လုံးထဲနဲ့ ဒီလိုဇာတ်ကားမျိုးရိုက်ခဲ့တာကို အခုအချိန်အထိ အံသြနေကြတယ်။ နောက်ပြီးဒီဇာတ်ကားဟာ စိတ်ကူးယဉ်ဇာတ်လမ်းလည်း မဟုတ်ဘူး။ တစ်ကယ့်အဖြစ်အပျက်လေ။ ဒါကို ကျနော်တို့ အားလုံးက ကိုယ်နိုင်တဲ့ဘက်ကနေ အစွမ်းကုန်ကြိုးစားခဲ့ကြတယ်။ ခံစား မှုအပြည့်နဲ့ သရုပ်ဆောင်ပေးခဲ့ကြတယ်။ အားလုံးရဲ့ဝိုင်းဝန်းကြိုးစားလုပ် ဆောင်မှုတွေကြောင့် အလွမ်းများနဲ့ဧရာဝတီဇာတ်ကားဟာ ယနေ့အချိန် အထိ ဂျပန်ပြည်သူတွေကြားမှာ ဆက်လက်စီးဆင်းနေဆဲဖြစ်ပါတယ်'' ဟု ဒါရိုက်တာသစ်သားမှ မိုးသောက်ကြယ်သို့ ရှင်းပြသည်။

ဆက်လက်၍ ''အခုလည်း အီဘာရာကီခရိုင်မှာရှိတဲ့ ဆုကုဘ တက္ကသိုလ်ကျောင်းသား/ကျောင်းသူတွေရယ်၊ Clover လို့ခေါ်တဲ့ အန်ဂျီအိုအဖွဲ့အစည်းနဲ့ မိတိုးမြို့မှာရှိတဲ့ A.Iဌာနခွဲမှ တာဝန်ခံတွေက A.Iနှစ် ၅ဝ ပြည့်အထိမ်းအမှတ်အဖြစ် ဒီအလွမ်းများနဲ့ ဧရာဝတီဇာတ် ကားကို ပြသချင်ပါတယ်ဆိုပြီးခွင့်တောင်းလာတယ်။ အဲဒီဘက်မှာရှိတဲ့ ဂျပန်ပြည်သူတွေကိုလည်း ကျနော်တို့နိုင်ငံမှာကျရောက်ခဲ့တဲ့ သဘာဝဘေးအန္တာရယ်ဆိုးအကြောင်းနဲ့ အုပ်ချုပ်သူတွေရဲ့ တာဝန်ကင်းမဲ့ခဲ့မှုတွေကို ကျယ်ကျယ်ပြန့်ပြန့်သိစေချင်လို့တဲ့။ ကျနော်တို့ကလည်း ခွင့်ပြုခဲ့ပါတယ်။ ပထမဦးဆုံး စတင်ပြတဲ့နေ့မှာ ကျနော်တို့ကို ဧည်သည်တော်အနေနဲ့ဖိတ်ပါတယ်။ ဒီဇာတ်ကားပြသပြီးတဲ့နောက် သတင်းစာရှင်းလင်းပွဲပါ လုပ်ထားလို့ မေးလာတဲ့မေးခွန်းတွေကို ဖြေကြားပေးခဲ့ရပါတယ်။ ''ဟု ဒါရိုက်တာကိုဌေးသစ်က ဆက်လက်ရှင်းပြခဲ့သည်။

ပြသချိန် ၂ နာရီကျော်ကြာမြင့်သည့် အလွမ်းများနှင့် ဧရာဝတီမှတ်တမ်းရုပ်ရှင်ဇာတ်ကားဖြစ်မြောက်ဖို့အတွက် အချိန်(၂)နှစ် ကျော်ယူခဲ့ရပြီး ဂျပန်ယန်းစုစုပေါင်း သောင်းတစ်ရာနှစ်ကျော် (ဒေါ်လာတစ်သောင်းနှစ်ထောင်ကျော်) ကုန်ကျခဲ့သည်။ အဆိုပါကုန်ကျငွေများကို မည် သည့်အဖွဲ့အစည်းထံမှ ငွေကြေးအရ အကူအညီတောင်းခံခြင်းမရှိပဲ ကိုယ်အိတ်ကိုယ်စိုက်ကာ လုပ်ဆောင်ခဲ့ကြခြင်းဖြစ်ပြီး ၎င်းဇာတ်ကားပြသမှုကြောင့် ရရှိခဲ့သည့် အကျိုးအမြတ်အားလုံးကို နာဂစ်ဒဏ်သင့်ဒေသများသို့ လှူတန်းခဲ့ကြောင်းလည်း သိရှိရသည်။

လာမည့် နိုဝင်ဘာ ၆ ရက်(တနင်္ဂနွေနေ့)တွင်လည်း နိုင်ငံတကာ လွတ်ငြိမ်းချမ်းသာခွင့်အဖွဲ့(Amnesty International)၏ နှစ် ၅ဝ ပြည့်အထိမ်းအမှတ်အဖြစ် တိုကျိုမြို့ရှိ ဂျပန်နိုင်ငံအခြေစိုက် A.Iဌာနခွဲမှ THIS PRISON WHERE I LIVE မှတ်တမ်းရုပ်ရှင်ကိုပြသမည်ဖြစ်သည်။

အဆိုပါဇာတ်ကားတွင် ၂ဝဝ၈ နာဂစ်မုန်တိုင်းသင့်ပြည်သူများကို ကူညီကယ်ဆယ်ရေးလုပ်ခဲ့မှုကြောင့် ထောင်ဒါဏ် (၃၅)နှစ်ချမှတ်ခံခဲ့ရသူ ကိုဇာဂနာအကြောင်းလည်းပါဝင်သည်ဟုသိရှိရပြီး အထူးဧည့်သည်တော်အဖြစ် ထိုင်းနိုင်ငံတွင်နေထိုင်နေသည့် နိုင်ငံရေးအကျဉ်းသားဟောင်းတစ်ဦးဖြစ်သူ ကိုထွန်းလင်းအောင်ကိုလည်း ဖိတ်ကြားထားကြောင်း A.I ဂျပန်ဌာနခွဲမှ တာဝန်ခံတစ်ဦးဖြစ်သူ Mr. Kumazawa၏ပြောပြချက်အရသိရှိရသည်။

ရေးသားသူ-မောင်ရှင်