လက်တွေ့နည်းကျ အောင်မြင်ပျော်ရွှင် ချမ်းမြေ့ စွာ နေထိုင်နည်း ပညာ (၅)
၅။ ပတ်ဝန်းကျင် (ENVIRONMENT)
ကျွန်ုပ်တို့သည် မိမိ ပတ်ဝန်းကျင်၏ လွှမ်းမိုးမှုကို များစွာ ခံယူရလေ့ရှိသည်။ ကောင်းသော ပတ်ဝန်းကျင်၌ နေသော် လူကောင်း သူကောင်း ဖြစ်လာပြီး၊ မကောင်းသော ပတ်ဝန်းကျင်၌ နေရသော် လူဆိုးသူဆိုး မကောင်းသောသူသာ ဖြစ်လာလေ့ရှိသည်။ "တံငါနားနီးတံငါ မုဆိုးနားနီးမုဆိုး"ဆိုသကဲ့သို့ ပတ်ဝန်းကျင်သည် များစွာ အရေးကြီးလှပေသည်။
ကျွန်ုပ်တို့သည် မိမိ၏ ပတ်ဝန်းကျင်ရှိ အပေါင်းအသင်း သူငယ်ချင်းများ၊ မိသားစုများ၊ လုပ်ဖော်ကိုင်ဖက်များ၊ စာအုပ် စာပေများ စသည်ဖြင့် သက်ရှိသက်မဲ့ အားလုံးတို့နှင့် မပတ်သက်ဘဲ၊ မဆက်ဆံဘဲနှင့် မည်သို့မျှနေ၍ မရနိုင်ပေ။ ထို့ကြောင့် ထိုပတ်ဝန်းကျင် နှင့် ဆက်ဆံ နေထိုင်ရသောအချိန် ကြာလာသည်နှင့်အမျှ မိမိ ပတ်ဝန်းကျင်၏ လွှမ်းမိုးမှုကို ခံယူလာရပေသည်။ မိမိ၏ ခံစားမှု၊ ယူဆတွေးခေါ်မှု၊ ရည်မှန်းချက်တို့သည်လည်း မိမိ၏ ပတ်ဝန်းကျင်နှင့် လိုက်လျော ညီထွေ ပြောင်းလဲလာရပေသည်။
ဥပမာအားဖြင့် ဆိုရသော်-ကျွန်ုပ် အလုပ်လုပ်သော ရုံး၌ မိတ်ဆွေတစ်ဦး ရှိသည်။ သူသည် အလုပ်ကို ကြိုးစားလုပ်ကိုင် တတ်သူတစ်ဦး ဖြစ်သည်။ ရုံး၌ အလုပ်စ၀င်လာစတွင် နေ့လယ်ခင်း လက်ဖက်ရည်သောက် နားချိန်၌ သူသည် ၁၀ မိနစ်သာ နားပြီး အလုပ် ပြန်လုပ် လေ့ရှိသည်။ ထိုအချိန်၌ သူ၏ လုပ်ဖော်ကိုင်ဖက် အလုပ်သမား အားလုံးက နာရီဝက် နားပြီးမှ အလုပ်ပြန်ဝင်လေ့ ရှိကြသည်။ ထိုအခါသူက သူ့လုပ်ဖော်ကိုင်ဖက်များအား "လက်ဖက်ရည်လေး တစ်ခွက်သောက်ပြီး နားတာ နာရီဝက်တောင် ကြာရသလား၊ ဘယ်လိုလူတွေပါလိမ့်"ဟု ဆိုလေ့ ရှိသည်။
နောက်နှစ်ပတ်ခန့် ကြာသောအခါ သူသည် လက်ဖက်ရည်သောက်နားချိန်၌ မိနစ် ၂၀နားပြီးမှ အလုပ် ပြန်လုပ်လာသည်။ နောက်တစ်လခန့် ကြာသောအခါ သူသည် နာရီဝက် နားလာတော့သည်။ ပြီးတော့ "အကုန်လုံး ကျန်တဲ့လူတွေ နာရီဝက် နားမှတော့ ငါတစ်ယောက်တည်း ဘာလို့ မနားဘဲ အလုပ် လုပ်မှာလဲ၊ သူတို့လိုပဲနေတာ အကောင်းဆုံး ပါပဲ"ဟု ကျွန်ုပ်အား ပြောလာသည်။ နောက် ၅နှစ် ကြာလာသောအခါ ကျွန်တော်တို့ ရုံး၌ သူသည် လက်ဖက်ရည်သောက် နားချိန် အကြာဆုံးသူ တစ်ဦး ဖြစ်လာပေတော့သည်။
သူသည် သူ၏ လုပ်ဖော်ကိုင်ဖက် ပတ်ဝန်းကျင်၏ လွှမ်းမိုးမှုကို ခံရပြီး လိုက်လျော ညီထွေ နေလာတော့သည်။ သူ၏အလုပ်ကိုကြိုးစား လုပ်ကိုင်တတ်သော အကျင့်စရိုက်ကောင်းလေးမှာလဲ တစ်စတစ်စ ပျောက်ကွယ်သွားတော့သည်။
အံ့ဖွယ်ကောင်းသည့် အချက်မှာ ကျွန်ုပ်တို့သည် ပတ်ဝန်းကျင်ကြောင့် ကျွန်ုပ်တို့၏ စိတ်ဓာတ်၊ ခံယူချက်၊ အကျင့်စရိုက် အစ ရှိသည်တို့သည် ပြောင်းလဲလာတတ်သည့် အချက်ကို ကိုယ်တိုင် သတိ မပြုမိကြသည့် အချက်ပင် ဖြစ်သည်။
သင်သည် ပျော်ပျော် နေတတ်သည့် လူများနှင့် ပေါင်းသင်း ဆက်ဆံနေလျှင် သင်လည်း ပျော်ရွှင်စွာ နေတတ် လာပေမည်။ ရည်မှန်းချက် ကြီးမားသော လူကောင်း လူတော် များနှင့်နေလျှင် သင်လည်း လူတော် တစ်ယောက် ဖြစ်လာ ပေမည်။ လူဆိုးလူတေ လူပွေများနှင့် နေလျှင် လူဆိုး လူပေသာ ဖြစ်လာပေမည်။ တံငါနားနီးတံငါ၊ မုဆိုးနားနီး မုဆိုးပင် ဖြစ်ပေသည်။
အရေးကြီးသော အချက်မှာ သင်သည် သင်၏ ဘ၀ကို တိုးတက် ကောင်းမွန်စေလိုပါက သင်၏ ပတ်ဝန်းကျင်ကိုလည်း ကောင်းမွန်သော ပတ်ဝန်းကျင်သို့ ကြိုးစားပြုပြင် ပြောင်းလဲပစ်ရန် အထူး အရေးကြီးလှ ပေသည်။
0 comments:
Post a Comment